Siday ni Yoyoy

My shaky "camcorder" video of Yoyo Genotiva as he delivered his "Siday" during the Necrological Service for Mayor Uy held at the City Hall stage last May 20, 2011. (Scroll down for the text of the siday)

DR. INING UY
(Diri Ka Namon Hingagalimtan)

Minahal ka namon labaw san ngatanan
Kon haros pa daw la amon ka ginduyan
Sa amon mga butkon ikaw kakantahan
Nga imo makita an pagpalangga nga ngaran.

Kon haros pa daw la amon ka sapnayon
Agud dire ka himulag san amon mga butkon
Kon haros pa daw la amon ka duduyanon
Kay palangga, pinalabi, pinaura ka gud namon.

Mao iton Mayor Uy an paghigugma nga ngaran
Sa amon kasing-kasing di ka namon hingalimtan
Kon amon igkukumpara katanding ka san bulawan
Nga daw sugad sadton dugos, katam-is san imo ngaran.

28 san Oktubre, tuig Singkwenta y Uno
Iginbugna adton anghel sa barangay san Oquendo
Igin-anak nga pan-tulo sadton upat nga magbugto
Anak sadton magtiayon Juan Uy ug Tita Sano.

Tungod sadton iya hingyap ug hataas nga ambisyon
Bali wara an kakablas, an pag-aram mapadayon
An hingyap san kasing-kasing diri pwede nga pag-utdon
San ungara nga makab-ot pagkadoktor nga propesyon.

Nakatapos pagkadoktor sa FEU nga liburan
Kumarawat san diploma, pero luha an puhunan
An pag-antos san kakuri sadton kakablas nga ngaran
Pero sulit adton luha kay topnotcher sa board exam.

Imbis kumadto sa langyaw gin-una an Calbayognon
Ginpaurog adton mga pasyente nga kablasanon
Kon aton igkukumpara, ug aton inu-inuhon
Kay nano mag-ilob dinhi nga waray man kikitaon.

Tungod sadton sakramento nga diri gud malilikyan
Iginkasal san kapikas nga daw rosas nga ladawan
San mabaysay nga daraga Jojie Rumohr adton ngaran
Lus-ay nga paghigugma-ay sadton altar ginsumpaan.

Ug dayuday nga nagbunga adton lus-ay nga higugma
Sadton suhag nga mabaysay gin ngaranan nga si Aica
Ug ginsundan san tabatsoy , si Jimjim nga ikaduha
An gwapito nga si Joey ug san puto nga si Jecca.

Adton gugma sa katawhan nga iya iginpakita
Pagserbisyo sadton kablas nga kapos sadton kwarta
Umalipwak an kahamot, daw birilngon nga sonata
Iya ngaran nagin bantog, nagin Champion sadton Masa.

Ug bumisgi adton bugna san Langitnon nga paglarang
Nga diri la sa pandoktor adton kablas pagsirbihan
Ug usa nga obligasyon an sa iya igintubyan
Pagsulod sa politika ug pagkapot katungdanan.

Ug dayuday nga umabid an burabod sadton gugma
Gugma nga daw bulawanon dalan ngadto san kapawa
Tuig 1986 san pag-aklas sadton EDSA
Sa pagka Bise Alkalde kan Cory gintudlok siya.

Ug padayon nga umusbong adton lus-ay nga suporta
Nagin Mayor sinin syudad tungod sadton aton gugma
Panhatag san rayandayan sa gilayon ginpaursa
Ug padayon nga panhatag san libre nga medisina.

Posisyon sa pagka Mayor nga sa iya igintubyan
Waray niya pagmantsahi kalimpyo san iya ngaran
Puno siya san pagbulig sadton nagkikinahanglan
Abri iya kasingkasing san kablas an kapalaran.

Durante san pagka Mayor nagin bantog an Calbayog
Awardee kit san kalimpyo Syudad nga dre masamok
Iba-iba nga pagdayaw kan Mayor Uy an umabot
Mga trophy, mga plaque ug damo nga pasindungog.

Hisgutan ta an proyekto tikang sa wala nga salog
Gin abrihan an kalsada abot ngadto macatingog
Gintulayan, ginkonkrito, kalsada nagtapos-tapos
Waray na sira magbaktas san dalan nga madalunot.

Didto san tu-o nga salog puno sadton rayandayan
Gin-abrihan an kalsada ug Hanging Bridge gintukuran
May proyekto nga Covered court ug may mga Iskwilahan
Konkrito nga mga dalan sadton kablas ginpupulsan.

Sa Calbayog nga distrito ngadto sadton kabukiran
Happy Valley ug Seven Hills an kalsada gin abrihan
Waray niya pasibay-i an pagsirbi san katawhan
Hingyap niya adton kablas matalwas san kakurian.

Natapos iya termino gin-undong ta sa kongreso
Nagin champion pagpaduso san mag-upay nga proyekto
Napuno san rayandayan adton primiro distrito
Didto sadton mga Isla mga sigad gin konkrito.

Iya pag-ugop san Samarnon diri na gud matutupngan
An mga panraug-daog diri niya tutugutan
An mangirhat nga abuso san mga kasundaluhan
Siya nagpoypoy san kabagsik, Berdugo nga si Palparan.

Pagkatapos san termino niya didto sa kongreso
Bumalik siya ka Mayor tungod hingyap sadton tawo
Padayon nga pauswagon an Calbayog iya plano
Pagpatukod san hospital sadton kablas nga molupyo.

An pag-uswag san Calbayog ug san Primiro Distrito
Si Mayor Uy sugad-sugad san diri pa nakuntento
Karuyag niya puypuyon an kurakot nga Gobyerno
Mawara an mga Hudas kawatan sa Kapitolyo.

Ug an bug-os nga suporta tigda dayon nga bumutho
Nagpadayag sadton bulig adton Segundo Distrito
Adton Recall nga Election samtang iginpoproseso
Mga kampon ni satanas mangirhat an mga plano.

Mao ini an hinungdan kan Dr. Uy kamatayon
Si kita an nagngongoyngoy samtang sira maglipayon
Pero ayaw kit kahulop diri naton ikagupong
Ira ini pagbasulan san pag-abot san panahon

Mayor anhi kami yana maguol sa huna-huna
Patraydor ka nga ginpatay waray ka man kunta sala
Amon mga kasing-kasing kon imo la nakikita
Tugob sadton kagul-anan, nagngongotngot san kasina.

Matalikod ka sa amon nga sa langit mabanaag
Nga sa luyo sadton dampog adton adlaw an masirak
An mangirhat ngan kapait nga ira panamas-tamas
Mao ini an tigaman san tinuod nga pagtalwas.

Matalikod ka na Mayor imo kami babayaan
Padayon nga pagpahuway sa mapinit nga lubnganan
Amon mga kasing-kasing tugob sadton kagul-anan
Waray na amon pinalangga, di' na namon makikit-an.

Waray na daw an matam-is, bulawanon mo nga hiyom
Di' na namon makikit-an magaya-gaya mo nga bayhon
An magtam-is mo nga tawa di na namon babati-on
Waray na an nakakalukmay nga magtam-is mo nga pulong.

Waray na daw an sandigan sadton amon mga inop
Sadton amon kakurian sino pa daw an maugop
Sadton amon mga hingyap waray na magpapabaskog.
Waray na daw makakablit oras san amon pagkahulop.

Waray na an amon Doctor, Doctor san Oquendohanon
Bisan dis-oras san gab-i nabuhat kon sasangpiton
Waray na an amon Doctor, Doctor nga mabinuligon
Nga kon waray kami kwarta libre kami konsultasyon.

Waray na an pinalabi san bug-os nga Calbayognon
Adton imo karantahon di' na namon babati-on
Waray na an gin-iidolo sadton bug-os nga Samarnon
Si satanas an nagbungkag san mabaskog nga paglaom.

Adios na sa imo Mayor imo kami tatalikdan
Sinin amon kasing-kasing di' ka namon hingalimtan
Sa amon mga huna-huna bayani an imo ngaran
Amon sa imo paghigugma waray ini katubtuban.

Masakit sa kasing-kasing adton imo kamatayon
Kinabuhi mo ginhalad san pag-ugop san Samarnon
Pero ayaw kabaraka di ka namon kakawangon
Kay si kami magburublig si saTANas pupukanon.

Ayaw kabudlay paglakat sadton imo kakadtuan
Kay an imo pagkawara kanan Samar katalwasan
An kabagsik sadton bala nga sa imo an nagpukan
Kinabuhi mo an dalan san mahayag nga darag-an.

Ayaw liwat kabaraka sinin amon kamutangan
An karig-on san Partido asya amon sasandigan
Ada si Onald Aquino nga sa imo masaliwan
Upod kan Mel Senen Sarmiento an maabtik nga Congressman

Lus-ay an amon pagtapod san bug-os ta nga konseho
Nga daw sugad san sakayan si Jimjim an magmaneho
Padayon kit nga malusbog diri na in magbabag-o
Inin aton pakigbisog mas makusog pa san bagyo.

Sadton imo mga anak di' ka angay mabaraka
Bug-os kami nga magi-os san imo mga ungara
Di' na kami magtatangis, ubos na amon mga luha
Di' na kami mahahadlok, ubos na amon mga kulba.

Imo mga pakigbisog amon ini igpadayon
Mapait mo nga kamatayon asya sa amon magparig-on
Diri kami mabubungkag san ira mga demolisyon
Diri namon itutugot an Liberal nga rubaton.

Padayon san imo panaw ngadto didto sa Himaya
An tiabot nga election di' ka angay mabaraka
Kay diri na mag-iiha gobernador na si Aika
Bise niya si Babalkon maabtik nga Abogada.

Adios na sa imo Mayor, adios na amon pinalangga
Sadton mapanraug-daog bahala na si Bathala
Adios na sa imo Mayor, Adios na ayaw kabaraka
Sinin amon pakigbisog ikaw kunta amon GIYA

siday

Let me give something I got from a blog follower named Billy Genotiva. Umangkon siya ni Yoyoy Genotiva ug adto siya yana nagta-trabaho sa Qatar. Adi an iya tula nga guin email sa akun.

ANG BUHAY SA ABROAD

Ni:Engr. Billy Y. Genotiva

Walang kasing sarap, kung mapapakinggan

Na ang isang tao’y nasa ibang bayan

Akala ng lahat ay puno ng yaman

Na subra ang hirap, ‘di lang nila alam…

Kung ating bigkasin, “abroad” ay maganda

Sari-saring lahi ang ‘yong makikita

May puti, may Ita, may singkit ang mata

Kung makipag-usap, English carabao pa.

Ang pangibang bayan ay swerte-swerte lang

Lalo’t makatagpo Kumpanyang mayaman

Kaysarap sumahod lalo’t buwan-buwan

Subalit ang malas sikmura’y kakalam.

Meron naman ibang kung inyong titingnan

Na kung umaasta ay puno ng yaman

Pawang dekorasyon ang buong katawan

Ngunit sa kabila ay puno ng utang.

Meron namang nais sa lungkot umiwas

Hanap ay kaibigan para may kausap

Nagpupunta ng bar babae ang hanap

Nasa isang sulok, paisa-isang shot.

Habang nasa disco mata ay balisa

Kislap ng dagitab nakakasorpresa

Lalapitan ang chicks agad pakilala

“I love you Sweetheart” susuportahan kita.

Si sexy nabula sa kanya’y sumama

Halos araw-araw mga Malls ang punta

“Love, kung anong gusto mo sigi mamili ka”

At paglabas ng Mall todo allowance pa.

Lumipas ang buwan si Misis nagtaka

Medyo nabawasan ang padalang pera

Agad tinawagan “Mahal ko bakit ba?

Bakit ito na lang padala mong pera”

Nagkabulol-bulol ang dila ni Pare

Wala sa anggulo nagkalitse-litse

Kun anong katwiran ang kanyang nasabi

At biglang nagduda itong si kumare.

Dahil isang switik itong si Kumpare

Biglang nagpadala ng medyo malaki

At si Misis nama’y wala ng nasabi

Ang puot kay Mister ay biglang napawi..

Di alam ni Misis, Mister may talento

Para makalusot nangutang sa bangko

Ang tunay na Misis dagling naareglo

Ang natira naman kay sexy naitago.

Bangko ay naningil paglipas ng buwan

Utang ni Kumpare hindi nabayaran

Hindi na nabigyan si seksi allowance

Lumipas ang araw si pare iniwan..

Biglang nagka-krisis itong buong mundo

Natanggal si Pare sa kanyang trabaho

Hindi na n’ya alam kung saan patungo

Paano si Misis, si sexy at Bangko.

Lumipas ang taon Bangko’y nagfile case

Itong si Kumpare hinuli ng pulis

Empty na si Misis empty na rin ang chick

At sa bilangguan siya ay nagtiis.

Habang nililitis ang kaso sa Korte

Desisyon ng huwes idiport si Pare

Kawawang mga anak, kawawang Kumare

Malas at kahihiyan ang dala ni Pare...

Dumating si Pare baon niya’y lungkot

Walang ibang dala kundi kanyang suot

Habang bumababa si Pare sa airport

Panay pangugutya ang kanyang inabot…

Kaya kaibigan kung mangibang bayan

Kuwento ni Pare’y di dapat tularan

Ang lahat ng tukso ay dapat iwasan

Upang makamit mo ang kinabukasan…

Siday ni Yoyoy: An Kultura san Calbayog

(Calbayog will turn 61 years old tomorrow. As a tribute to his beloved city, Yoyo Genotiva gave me a copy of his siday in time for the Charter Day celebration)

AN KULTURA SAN CALBAYOG
“Calbayog- Siplati An Nakalabay”

yoyoy r. genotiva

Pulong pa man san istorya sadton mga kalalagsan
Sadto nga daw Paraiso an Calbayog sa Sirangan
Dinhi sinin paraiso adton gugma iginlarang
An pagbugna san Guino-o sa kan Eba ug kan Adan,
Matahom nga pagduhaan dinhi nira ginsumpaan.

Sa butnga san Paraiso pagkatahom nga tan-awon
San imo mga ungara waray ka pag-iiliwon
Nagkakalpad adton maya, san paghuni waray hunong
An rampagas sadton balud daw sonata nga matahom
Nga dayuday kumpanyahan huni sadton ubon-obon.

Kon nasulhog na an adlaw sadton Perlas nga Sirangan
Dungan adton panugaok, mga manok sa higtanan
Upod adton pagsaburak san grasya san kahitas-an,
Maduong an mangarawil, may isda na sa hubasan
Matupo an parag-uma mga duma ira pas-an.

Pag-abot san kakurulpon panahon na pagrosaryo
Nagtitirok an pamilya para sadton pangamuyo
Ada dida gintututdo adton mga pagrespito,
An pagharok sadton kamot san lagas nga gintatapo
An pagkarawat san sayop ug pangaro san pasaylo.

Panahon san kagab-ihon mga buyog nagkakalpad
Bitbit nira an guitara, maniniba sadton bukad
Mga awit sadton gugma asay nira ginhahalad
Kan kanay ba kasing-kasing adton dire mababantad
Sino ba nga alibangbang adton dire magpauswag.

Sadton mga pag-urosa san panahon san kalipay
Nakarusong sadton plaza waray tawo adton balay
Upod adton kaayaman pati adton mga misay
Magkikita san kuratsa san gala nga sinabragay
Nga daw nagkukumpetisyon san gala nga padamuay.

Panahon kon may naabot nga bisita sa pamilya
Patigayon pag-istimar bisan dire gud kilala
An maupay nga batasan karuyag ta igpakita
Bisan manok iburulang dayon naton ginlalaga
“Agwanta la kam san manok, kon nakadulog salmon kunta”

Panahon san kapyestahan nalilipay an katawhan
Bisan makuri an kwarta nag-aandam an ngatanan
Para bongga adton handa nalilisang san pangutang
Karagutok sadton litson , darayawon nga handaan
Pagkaliwas sadton pyesta kahapdos sadton baraydan.

Darayawon an kultura sinin syudad san Calbayog
Pag-istimar san bisita nga daw kita nababantog
Dire naton igkalikaw kay kita ngatanan sayod
Bisan sadton katalagman dire kita nahahadlok
Tungod kay dire man kita nalilimot ngadto san Dyos.

An bantog ta nga Kultura angay naton pagmangnu-an
Ipadayag adton iba nga usahay nalilimtan
Igbalik ta an Harana ug pag-amen sa kalagsan
Pursigihon pagpaursa an Kultura kinadaan
Tungod ini an salamin sadton aton kakadtuan.

siday ni Yoyoy Genotiva: Halad San Birhen “La Natividad”

Dayuday handom ka sa adlaw ngatanan sadton kakurulpon
Upod san banaag san bugtong nga bulan ug mga bitu-on
Adton mga inop kaupod san banwag sadton kagab-ihon
Padara ka san Dios sa bawbaw san tuna tagsalbar ka namon.

Lantaw ka na namon bisan waray ka pa sa amon iglarang
An tim-os nga amon mga kalipayan ikaw an hinungdan
An mga rampagas sadton mga balud san kabaybayunan
Duyog sin pagliaw, adton imo gahom nga asay taglarang.

Lamrag sadton bug-os nga mga Calbayognon an imo pag-abot
Nasulit an mga pagkaburubingkil san amon mga buot
Bisan adton kulba kalit nga napapas ug mga kahadlok
Sadton pag-abot mo bug-os nga Calbayog dako an pagtapod.

An imo anino sa butnga san landong sadton kakurulpon
Asay an nag-usa ug an nagpatirok sadton Calbayognon
Sa mga kalipay ug mga himangraw duyog an paglaom
Natawo an takna, an petsa ug bulan sadton imo patron.

Otso san Setyembre asay an tigaman san lus-ay nga gugma
Ladawan san tim-os ug himyang san amon mga pag-urusa
Bantog ug dinayaw san bug-os nga siglo adton imo pyesta
Syudad san Calbayog adton imo patron amon gin-ungara.

Bisan adton damgo, mga pagkaturog sa imo nailiw
Mga pangamuyo sa imo an syudad daw waray pagbil-iw
An imo katahom tigaman san lamrag birhen nga hamili
Ikaw adton birhen, an La Natividad nga Oray ug putli.

Sonata ka sadton amon mga inop mabugnaw nga takna
Tagliaw ka namon san mga kasubo ug mga kasina
Duyan nga natabyog nga asay sa amon mga nagpalangga
Banwag ka san inop, usa ka nga bertud nga puno san gugma.

Kon naabot ngani panahon nga adlaw imo kaadlawan
Waray pagpahuway adton Calbayognon duyog sin paglibang
Naduyog paghatag sonata an huni sadton katamsihan
Nga ginduduyugan san tunog daw awit rawiswis kawayan.

Bisan adton kalaw nga bisan pa ngani sira kagurangnon
Nahalad san ira matam-is nga awit sa imo pagdumdom
Labi kon naabot an nayap nga takna sadton kakurulpon
Iginpapaabot sa imo an ira mga pamalandong.

Kon nababati mo sadton kakurulpon bagting san kampana
Waray pagpahuway adton Calbayognon agud halaran ka
Kon naabot ngani takna nga mamingaw sadton kagab-ihon
Bagting san lingganay nga halad sa imo upod an orasyan.

Bisan adton lamrag san aton gamhanan nga bulan, bitu-on
Adton ira banwag ginhalad san imo lus-ay nga katahom
Bisan pa man ngani tugaok san manok sadton kaagahon
Ginhalad sa imo upod an sonata daplin sa baybayon.

Kon naabot ngani takna sadton amon mga pagpahuway
Mga pamalandong nga halad sa Imo oh! Iroy nga Oray
Naabat dayon sa mismo nga takna an mga kalipay
Nagigin huyayag an tagsa nga amon mga panimalay

Adton imo ngaran usa nga sonata kon amon bation
Nahatag murayaw mga huna-huna sadton Calbayognon
Nakakapuypoy ka san mga problema sadton masurub-on
Nakakalamrag ka sadton huna-huna nga nagdadalumdom.

Minahal nga Birhen sa yana nga takna kaadlawan mo na
Ihatag mo kunta sa amon an lus-ay nga pagkaurosa
Sadton mga sala amon ginhahangyo nga kami salbara
Kon may ada kami sala nga nabuhat kami pasayloa.

Panalipdi gad man adton Calbayognon sadton kakurian
Talwasa gad kami san mga mangil-ad nga mga karat-an
Amon katalwasan waray iba ikaw amon lalauman
Kay ada sa imo an gahon san langit san Dios nga gamhanan.

Pananglit adto ka sa langit ug an Dios imo makahampang
Alayon pagsiring sa Iya nga Siya amon kinahanglan.
Ayaw gad kalimot ngan alayon liwat sa Iya pagkablit
Nga kami nahulat ngatanan nga ora san Iya pagbalik.

Otso san Setyembre kon mahimo ngani kaadlawan mo man
Amon mga hangyo sa imo dire mo kunta hingalimtan
An amon pangandoy ngatanan nga oras adton kalipayan
MAUPAY NGA PATRON, SA IMO, SA IRA, SA ATON NGATANAN.

break anay: siday ni Yoyoy

Hi there! My friend Yoyoy gave me another composition, para kunu dire kit magpinanangis, katatawa naman. Here it is:

An Lotto

Maupay nga adlaw mga kasangkayan
Inin akon siday kunta pamati-an
Kon baga ugaring may ada tamaan
Pasensiya la sangkay di ko tinuyuan

Mga kasangkayan ako may komposo
Ayaw igmabug-at pamati-i niyo
Ini nga istorya dire kay anano
Parti sadton Lotto nga usa nga huego.

Sadto san an Lotto san dire pa uso
Iyo sadto bulsa pirmi may sinsilyo
Pero iton yana san dida uso na
Pirmi waray sulod iyo mga bulsa

An ngaran nga Lotto masyado mapintas
An ginpupuntirya adton mga kablas
Ultimo pampalit lugawon nga bugas
Susudsuron pa gud kubrador nga dugas

An mga kolektor nagsusupat-supat
Bitbit an resulta upod an panguwat
Bisan waray inop sigi an panumat
Tatay-an man liwat sadton mga uwat

Iba nga kolektor ada sa kalsada
Baga executives may ballpen sa bulsa
May mga di motor may naka bisiklita
An mga puntirya kanan kablas bulsa.

An tayador naman waray mga kulba
Para makataya gamit pinamrenda
Sa kada pangaon adton sura ‘single’.
Pero adton Lotto pirmi ginra-rumble.

Pagka-aga-aga bata maiskwila
Maaro sin balon kuno waray kwarta
Pero kon kulop na imo makikita
Adto sa kolektor kay ngay-an mataya.

Antis nga mataya kinaptan an puzzle
Buru-baliktaron, gin a-‘angle-angle’
Haros nga magkulop pagbali-balihon
Pero pagka-aga pirdi la gihapon

Usa taga bukid kumadto sa baryo
Kay may-ada inop gintaya an singko
Pag-uli sa balay gulpi nga aragway
Kay waray gin-asin san utan nga gaway.
Usa nga babaye san iya pagmata
Dayon niya daop harampang umintra
Waray tagi pulong dayon niya baton
“Kakarag, kanugon, nabalikad akon.”

Inin mga tawo dire nanunomdom
Bisan daw pordoy na taya la gihapon
Isgan san asawa nano ka ba iton?
Gintataya mo pa iparalit hipon.

Mabaton an uwat aringasa mo man
Baman kon magdaog aton man ngatanan
Hasta nala kita nga gin-gagaba-an
Dire kit natama imo kamayakan.

Kairo intawon sinin aton bugto
An ginpipininsar pirmi na la Lotto
Mahuram tricycle banyak siniguro
Kay an 6/49 dako adton premyo.

Dayon la pagbuhat masirom-sirom pa
Imbis manhiram-os una an resulta
Kuri pa intawon mabuklad an mata
Makadto sa gawas kay mangingiana.

Pastilan kapait paghuna-hunaon
Imo binalhasan iba an magkaon
Alagad si intoy waray ngani balon
Naglaba si nanay haros waray sabon

Anano man siton an imo darag-an
Usa kuntra yukot an imo kalaban
Makuri ka ngani magdaog sa bulang
Nga duduha gud la imo pipilian.

Sanglit kasangkayan paghuna-hunaa
Makuri kaupay pamiling san kwarta
An imo gintaya kon gin-alkansiya
Pag-abri mo kunta kadako nga kwarta.

Mga kasangkayan ayaw la kasina
Kon baga nabantad imo huna-huna
Waray ako tuyo sa imo paghusga
Lugod pahinumdom ini sadton iba.

Bangin ka sumiring sa akon kalaw-ay,
Nga malabot-labot ngan subra matamay
Letra man la ini, pasensiya la sangkay
Pag-aanhon ta man kon imo kalipay.

Inin akon siday mga kasangkayan
Waray ako sini ginpapatamaan
Pulong san puplungon, ‘bato-bato sa langit,
Kon sino tamaan dire la maurit’.

Yoyoy R. Genotiva

siday: Calbayog - Mutya san Samar

In celebration of the 60th birthday of Calbayog, Yoyoy Genotiva gave me permission to feature a composition - SIDAY - in my blog.

CALBAYOG - Mutya San Samar

I
Inop ka nga syudad probinsiya san Samar
Natundan nga dapit ikaw nakalandaw
Bugtong nga Syudad ka nga amon minahal
Ngaran mo Calbayog, Katahom, Katin-aw.

II
Calbayog syudad ka, malamrag, hamili
San mga Samarnon ikaw pinalabi
Syudad nga natindog reyna nga pinili
Adton imo dagway matahom ug putli.

III
Calbayog Syudad ka san mga Samarnon
Syudad sadton lus-ay, matam-is nga hiyom,
Syudad sadton siplat nga may kahulugan
Nga nakakapukaw sadton mga dughan.

IV
Calbayog Syudad ka sadton kabukiran
Duyan san pagsirak, pagtunod san bulan,
An imo anino sadton kakurulpon
Daw ranggat san Perlas an imo katahom.

V
Calbayog Syudad ka sadton kagurangan
Nga ginsasalagan sadton kahayupan,
Adorno nga bukad sadton kakahoynan
Bukad san orkedya hymno an tigaman.

VI
Calbayog syudad ka daplin sa baybayon
Baybay nga may gugma sadton kablasanon,
Adton mga isda puno san paglaom
Grasya sadton kablas an imo kinhason.

VII
Calbayog Syudad ka ni Maria Clara
Bungto san magbaysay nga mga daraga,
Calbayog Syudad ka sadton mga Rajah
Natindog pag-ugop san iya konsensiya.

VIII
Calbayog Syudad ka nga dire kalimtan
Bisan diin dapit sinin kalibutan,
An mga nahirayo nga aton kabugtuan
Naturo an luha kon ikaw hinumduman.

Yoyoy R. Genotiva

Happy Mothers' Day

Happy Mothers' Day!

Last year I featured in this blog Yoyoy Genotiva's waray-waray translation of Desiderata. This time I requested him for a poem dedicated to mothers and he gave me this:

A N A K

I
Siyam ka kabulan nga gin-iinantos ni nanay sa tiyan
An bug-os nga kalag iya iginhald, imo kaupayan,
Gin-ilob an kuri, gin-antos an sakit sinin kalibutan
Kay hingyap ni nanay nga makakita ka sinin kahayagan.

II
Dako an kalipay pagbati ni tatay sadton imo uha
Sadton panimalay nga sadto mamingaw nagin bulahan ka
Katutnga san gab-i nabuhat si tatay san gatas pagtimpla
Waray pagkaturog si nanay sa imo kay ginduduyan ka..

III
Kon tikang sa pagal si nanay si tatay ikaw kalipayan,
Sadton panimalay ikaw an nagigin usa nga tanaman
Kon ikaw maysakit si nanay si tatay subra an kalisang
Dad-on ka sa doktor bisan waray kwarta pirit nga mangutang.

IV
An mga hugaw mo gin-antos ni nanay sin pira katuig
Nabuhat si nanay katutnga san gab-i kon ikaw nagtatangis
Ikaw ginkukugos, ginkakantahan ka upod an pagharok
“Katurog na anak, adi ka sa butkon, sigi na katurog”.

V
Kon nakaturog ka daw haros dire ka langaw pahapunan,
Ginkakantahan ka, ginharapihapan ug ginkakantahan
Kon nagtatangis ka si nanay nga iroy subra an kalisang
Ikaw ginkukugos, dayon ka pasus-on, dayon mo pag-undang.

VI
Yana dako ka na iba na an imo mga pamatasan
Waray na si nanay nga nag-iinantos nga imo ginmat-an
Nakalimtan mo na nga ikaw may iroy sinin kalibutan
Kay ikaw dako na, pwede na mabuhi bisan mag-usahan.

VII
Yana dako ka na, bukog mabaskog na, si nanay kuntra na
Di mo na karuyag nga ikaw pagyaknan ug pagsagdunan pa
San yakan ni nanay, san yakan ni tatay ikaw nasisina
Nasagbang kan tatay, nasagbang kan nanay nga pinsikla pa.

VII
Si nanay nga iroy puno san kalooy kay tungod anak ka
Bisan nagtatangis iya gintatago an luha sa mata
An yakan sa imo ni nanay mahinay anak pagbag-o na
Pero nasikla ka tungod kay anano, ikaw makusog na.

VIII
Tungod san pagsubo ni nanay sa imo siya nakagyakan
Ini na ba anak an imo ginbalos san akon pag-antos
Kon maaram la ak mao ngay-an ini akon pag-agian
Ginpunit ko ikaw san nakadi ka pa sinin akon tiyan.

IX
Tungod kay hingyap man ni tatay, ni nanay ikaw mapauswag
Ginpaiskwila ka puno san paglaom nga magbabag-o ka,
Ang hingyap ni tatay, an hingyap ni nanay an makatapos ka
Hangtod nga natapos mo an sekondarya upod an diploma.

X
Dako an kalipay pagbati ni tatay sadton imo larang
Nga ikaw magikan sa iba nga lugar didto ka mag-aaram
Tungod kay hingyap man ni tatay ug nanay imo kauswagan
Gumikan ka dayon, si tatay, si nanay imo gintalikdan.

XI
San nakadto ka na sa iba nga lugar sa butnga san syudad
Waray na si nanay sanglit sunod mo na an imo karuyag
Waray na si nanay nga sadto sa imo pirmi nakabantay
Bisan anano pa imo mga bisyo waray na magsasaway.

XII
San nakadto ka na kaupod san imo mga kasangkayan
Ngatanan nga buhat, ngatanan nga bisyo imo na gin-adman
Pirmi ka naaro nay padad-i ako may mga baraydan
Kairo ni nanay, kairo ni tatay, imo ginlimbungan.

XIII
Waray igsarabot si nanay, si tatay san imo mga buhat
Nga ikaw nainom ngatanan nga klase sadton mga alak
Di ka naiskwila kaupod ka pirmi san mga barkada
Adto sadton kanto naninigarilyo, nagma-marijuana.

XIV
Waray pag-iiha san mga buhat mo nahibaruan ka
Si nanay, si tatay nga anhi nagkuri naturo an luha
An yakan ni nanay nga kon dire daw la sala an pag-unay
San mga kasakit tibway nala lugod si ako mamatay.

XV
An mga buhat mo an nagin basuni sa kan nanay dughan
Tungod san problema nasakit si nanay ikaw an hinungdan
Gin-ilob ni nanay, gin-antos ngatanan an mga problema
Pero kablas palad iya kinabuhi ginbawi sa iya.

XVI
Ginhayad an patay nga lawas ni nanay may luha sa mata
Kay tungod tingali nga siya namatay waray kam magkita
An ginbuhat nala ni tatay sa imo an magtelegrama
Uli na gad anak, sigi na uli na inay mo patay na.

XVII
San imo pagbasa sadton telegrama kan tatay padara
Kadagko nga luha adton nangangabid san imo mga mata
San imo pagbakho waray ka mapugngi nakaguliat ka
Diyos ko kay anano mahal ko nga iroy imo pa ginkuha.

XVIII
Yana anano na imo bubuhaton si nanay patay na
Tubtob ka na daw la nga magpapaabid sadton mga luha
Waray na si nanay nga sadto sa duyan ikaw ginkantahan
Waray na si nanay nga kon maysakit ka subra an kalisang

XIX
Hain mo na daw la nga dapit si nanay yana pagbibilnga
An imo araba, an imo pagbasol waray na urhi na
Bisan pa anano kakusog san imo mga pangaraba
Waray na si nanay, waray na patay na di mo na makikita.

XX
Sino pa an imo aruan san imo mga pagpasaylo
Sino pa an imo angay nga pagdangpan si nanay waray na
Tubtob ka na daw la nga magpapaturo sadton mga luha
Waray na si nanay sino an basulon kundi ikaw manta.

XXI
Kairo ni nanay nga sadto sa imo nga nag-iinantos
Kairo ni nanay nga bisan kon pagal pirmi ka kinugos
Kairo ni nanay nga pagtatahuban mapinit nga tuna
Kairo ni nanay san iya paglakat balon pa an luha.

XXIII
Yana aada ka sa ulhan ni nanay naturo an luha
Kinaptan an buhok nga nagbabangoyngoy nanay pagmata na
Nanay kay anano nga nailob mo la nga ako bayaan
Nanay tibway lugod si kita mag-unong didto sa lubnganan.

XXIV
Sugad ka sin kahoy an ngaran dalakit nga akon nakita
Diin siya turok didto sadton sanga igkasi kahoy manta
Kahoy nga dalakit dida san an iya sanga marampag na
Kahoy nga gintudkan waray na balusi ginpatay pa niya.
KAKARAG….KAKARAG….KAKARAG

yoyoy r. genotiva
November 1982