Desiderata: in waray-waray

I met Yoyoy Genotiva today. He gave me a copy of his latest work - a translation of that classic inspirational piece Desiderata. He gave me permission to feature his work in my blog.

Pagpati-anod sin tawhay upod san maalingogngog nga pagkagupong. Ngan tigamni nga aada an tam-is san mahimyang nga paminsar sa butnga san kamurayaw.
Kutob san imo makakaya upaya an imo relasyon sa imo igkasi tawo.
Ipagawas an kamatuoran san matadong ug malinaw nga paagi; Pamati-i an iba kay bisan an mga maluya an pagsabot ug adton mga waray kinaadman may ada liwat sira karuyag signgon.

Likayi an hinambog ug mapanraog-daog nga kinaiya, mao iton an tunok nga makakaulang san imo kalag.
Ayaw pakigtanding sa iba kay tingali magpalabi-labi ka san imo higayon, ngan kon hamubo imo pagkita san imo kalugaringon bangin magin mapait an imo pagtan-aw san imo kinabuhi;

Tigamni nga may ada pirmi nalabaw ug naubos sa bawbaw san kalibutan;

Lugod magin kuntento ka san imo nakab-ot nga grasya ug ipadayon an ngatanan nga mag-upay mo nga mga plano san imo kinabuhi.

Hatagi importansiya an imo naabot nga higayon kon nano man iton kahamubo kay mao iton an tinuod nga manggad nga ginhatag san panahon. Pagtagam san kada oras nga pakigrelasyon sa imo igkasitawo kay sa luyo san kamatu-oran damo an malingo ug malimbong nga sangkay; Ayaw kalimiti an mag-upay nga mga gawi ug pamatasan kay damo an karuyag nga makab-ot an darayawon nga kinabuhi, kay mintras an tawo nabubuhi sa bawbaw san tuna damo an naghihingyap nga magin bayani.

Ipaangbit an imo ungod nga pagkatawo ngan ayaw pagpakita san buwa nga pakig-angay;

Ayaw pagmaan bisan kon napakyas an imo pagtapod kay upod siton kon an imo gintanom an gugma iton an magpapadayon sin pagtubo ug padayon panaringsing sugad san usa nga tanaman.

An nanlabay san imo kinabuhi amo an pinakamaupay nga leksiyon nga imo nahibaruan,

ngan pabay-i ug huyayag nga limuta an mga nanlabay ngan lugod pakusga an mga tidaraon nga panahon kay mao iton an magigin marig-on nga pwersa ug taming san tiabot nga panahon. Likayi an pagpinas-an san mabug-at nga pagkahulop kay kaurogan san aton mga kahadlok ug kabaraka natikang san aton kamingaw ngan pag-inusara.

Ngan lugod bug-usa an imo pagtapod ug pagdasig san imo kalugaringon upod an hugot ug marig-on nga pagtu-o kasumpay san hugot nga disiplina.

Anak ka san Langitnon nga Bahandi. Labot san kakahuynan ug kabitun-an, ikaw man may ada katungod dinhi sa bawbaw san tuna ngan maruyag ka sa dire, padayon an waray katapusan nga pagtiyog san kalibutan.

Kon sugad padayon nga magin murayaw ka sa kamot san aton Langitnon nga Amay kon anano man an imo pagtu-o bahin sa Iya. Kon anano man an mabug-at nga mga paras-anon ngan kabilinggan san kinabuhi hatagi gihapon huyayag an imo kalag. Bisan san mga kasakit, mga pagtamay ug panraug-daog upod san mga inop nga nakawang hinumdumi nga matam-is la gihapon an pag-ukoy sa bawbaw san kalibutan. Padayon an magtam-is nga hiyom. Padayon an hingyap nga kauswagan para san tim-os nga kalipay.

Yoyoy r. genotiva
December 16, 2007